Обвисценє
19. мая 2025.
Обвисценє
16. сентября 2025.
Вецейрочни проблем слабого прецеканя води у керестурским базену под час вельких горучавох тих дньох би требал буц тирвацо ришени, понеже закончена роботна акция у хторей ше положело нову вакумску пумпу.
Пре исти проблем, пред трома роками викопана студня, та ше воду прейґ моторчка за залїванє по потреби пущало до базену, медзитим, з часом ше указало же таки способ ришованя проблему драги, понеже за вецейгодзинову роботу моторчка було потребно вельо горива.
Прето, тих дньох, а на инициятиву Явного комуналного подприємства „Руском”, положена нова вакумска пумпа хтора тераз приключена на главни вод електродистрибуциї, цо значи же трошки за єй роботу буду вельо менши.
З роботу ше почало концом прешлого тижня, штварток 26. юния, та през перши два днї прекопана траса и положени под’жемни шнур од 4 KW. Роботи ше предлужело того тижня, пондзелок, кед положена пумпа и циви, а шлїдуюцого дня над пумпу положене закрице. Нова пумпа дава 550 литри у минути, цо значи же за 48 годзини цалком може наполнїц базен зоз воду.
По словох директора Рускому, Владимира Олеяра, пумпа будзе нєпреривно робиц кед вельки горучави, а накадзи порошнє водостой рикох, односно накадзи вода зоз беґелю почнє чечиц през базен, пумпу ше будзе викапчовац.
Главни орґанизатор и финансиєр роботох ЯКП „Руском”, а подпомогли и Месна заєднїца Руски Керестур, Електромонтажа, Т-ПАМ, Добродзечне огньогасне дружтво, як и поєдинци з валалу.
